Padayon ang Serbisyo Diretso sa mga Antiqueño!

Ginakalipay ko nga ipagkigbahin nga ang House Bill 9468, nga nagatuyo magpatindog kang isara ka sangay kang Land Transportation Office (LTO) sa banwa kang Pandan, Antique, ay madinuagon nga nakapasar sa Third Reading sa Senado kadya nga adlaw!

Ang House Bill 9468 nakapasar sa House of Representatives katong Nobyembre 29, 2023. Ang layi nga dya, nga atun ginpangunahan sa pagduso sa Kamara de Representantes, ay co-sponsored ni Senator Loren Legarda sa Senado. Kami ni Manang Inday, Senator Loren

Legarda, imaw nga nagtinguha agud siguruhon nga mangin matawhay kag komportable ang proseso para sa atun mga driver kag tag-iya kang mga sarakyan sa Norte nga parte kang Antique. Hindi ron nanda kinahanglan magbyahe kang malawid nga inoras paagto sa San Jose de Buenavista agud magbuol kang lisensya ukon magparehistro kang sarakyan. Sa dya nga pamaagi, makatipid sanda sa oras kag mabuhinan ang anda kakapoy.

Akun gid ginapabugal ang ginpasad nga layi nga dya tungod isara dya sa importante nga tikang agud mapalab ot ang mga serbisyo kang gobyerno sa sektor kang transportasyon sa norte nga bahin kang Antique. Sa tulad, duro pa sa gihapon ang nabudlayan sa pagbyahe kang pira ka oras agud makaaagto sa opisina kang LTO sa San Jose de Buenavista.

Pinaagi dya kara, mas mangin madasig, accessible, kag mahilway ang mga serbisyo kag transaksyon sa opisina kang LTO. Sigurado nga magatugro dya kang benepisyo hindi lamang sa mga taga-Pandan, kundi pati man sa mga iningod nga kabanwahanan.

Dya ang simbolo kang akun padayon nga pag-ulikid sa nanari-sari nga sektor kang atun probinsya kag ang akun determinasyon nga mas mapa-ugwad pa ang mga dya.

Padayon ang pagseserbisyo kang tampad, para sa mas masanag nga buwas damlag para sa tagsa ka Antiqueño!