DENR VI Nagapanawagan sang Husto nga Pagpanghipid sang Basura sa Dinagyang kag Ati-Atihan 2026

Iloilo City- Ang Department of Environment and Natural Resources (DENR) Region VI, nagapanawagan sa publiko—lokal man ukon turista—sa nagahilapit nga selebrasyon
sang Dinagyang kag Ati-Atihan Festival subong nga bulan sang Enero, nga mangin responsable sa ila mga basura paagi sa husto nga pag-bahin-bahin ukon pagseparar sang mga ini, suno sa klase kaangay sang madunot kag indi madunot.

Ini nga tikang nagatuyo nga masiguro nga samtang ginaselebrar ang nasambit nga kapiyestahan nga may kaanggid sa kultura kag pagtuo sang mga Ilonggo, ginahatagan man sang importansiya ang katinlo sang palibot.

Ang DENR VI nagapangabay sa publiko nga sundon ang husto nga paghaboy sa mga "designated trash bins" nga makit-an sa palibot sang siyudad, ilabi na sa mga dalanon kag sa judging areas. Importante nga na separar ang mga Biodegradable (madunot), Non-biodegradable (indi madunot subong sang plastic kag wrapper), kag Recyclable (mga botelya kag lata). Ang husto nga pag-segregate indi lamang makabulig sa madasig nga pagkolekta sang basura, kundi makapahagan-hagan man sa kadamuon sang basura nga mapagadto sa aton ” landfill.”

Nagapahanumdom man ang DENR VI nga likawan ang paggamit sang single-use plastics kag kon mahimo, magdala sang kaugalingon nga reusable nga botelya sang
tubig kag bag para sa pagbakal sang mga pagkaon ukon souvenir.

Ang Dinagyang kag Ati-Atihan Festival mga selebrasyon nga bukas sa tanan; gani, himuon naton ini nga eco-friendly and green festivals paagi sa pagpakita sang disiplina sa aton basura.

Dumdumon naton nga ang katinlo sang probinsya kag siyudad sang Iloilo amo ang salamin sang aton pagka-Ilonggo.

Sang nagligad lang nga tuig 2025, may gintalana nga masobra 82 ka tonelada nga basura ang nakolekta sang matapos ang tatlo ka-adlaw nga highlight sang Dinagyang, samtang wala sang may natalana nga datos sang Ati-Atihan apang madamo ang nagreklamo sa tambak nga basura nga nabilin sa mga festival zones sang nasambit nga aktibidades./DENR6