Ceres Bus sa Panay, Nagpatupad ng Dagdag Pasahe Simula September 28

ILOILO CITY — Mas mataas na pamasahe ang ipinatutupad ng Vallacar Transit Inc. (VTI), operator ng Ceres buses, simula Setyembre 28, 2026, kasunod ng pag-apruba ng Land Transportation Franchising and Regulatory Board (LTFRB) sa bagong pasahe para sa mga provincial bus.
Sakop ng fare adjustment ang mga ruta ng Ceres sa Panay Island, kabilang ang mga biyahe na nag-uugnay sa Iloilo, Aklan, Capiz at iba pang bahagi ng Western Visayas.

Ayon sa bagong fare rates ng LTFRB, ang ordinary provincial bus ay may minimum na pamasahe na ₱12 sa unang limang kilometro, mula sa dating ₱11. Ang succeeding kilometer ay naging ₱2.20, mula ₱1.90.
Para naman sa iba pang uri ng provincial buses, itinakda ang sumusunod na rate bawat succeeding kilometer:
Air-conditioned: ₱2.45
Deluxe: ₱2.60
Super Deluxe: ₱2.70
Luxury: ₱3.35
Nauna nang nagpahayag ang Vallacar Transit noong Marso na hindi muna ito magtataas ng pamasahe sa mga ruta nito sa Panay, Negros at Cebu matapos ipagpaliban ng pamahalaan ang implementasyon ng fare increase.
Samantala, ipinaalala ng LTFRB na kailangang maipakita ng mga PUV operator ang kaukulang fare guide o fare matrix bago ipatupad ang bagong pamasahe. Pinananatili rin ang 20-percent fare discount para sa mga estudyante, senior citizen at persons with disabilities.
Ang fare adjustment ay ipinatupad nationwide kasunod ng pagtaas ng operating costs at presyo ng langis na nakaapekto sa public transport sector.