Latest News
APPO handa sa malawak na pagpapatupad ng seguridad sa Araw ng mga Patay;
Ni: Mary Hope Zonio
Inihayag ngayon ng Aklan Police Provincial Office o APPO na handa na ang kanilang buong tauhan para sa nalalapit na Araw ng mga Patay.
Ayon kay PCpl. Leonelyn Artes, tagapagsalita ng APPO na magkakaroon sila ng deployment ng PNP personnel sa mga matataong lugar kagaya ng sementeryo, simbahan at public transport area tulad ng ports at terminals.
Aniya, inaasahan nila ang pagkakaroon ng malaking numero ng mga magbabiyahe sa Araw ng mga Patay lalo na at pinapayagan na ang face to face na pagbisita sa mga pampublikong sementeryo.
Dagdag pa nito na ang nasabing petsa ay isang mahabang bakasyon dahilan upang marami ang magpapasyang umuwi sa kani-kanilang lalawigan upang makapagbisita sa kanilang mga mahal sa buhay na yumaon na.
Samantala, naka full alert status naman ang buong hanay ng pulisya sa nasabing araw upang mas mabigyang halaga ang mapayapa at maayos na pagbisita sa mga pampublikong sementeryo.
