DBM, tiniyak ang pagsusulong ng mas malalim at digital-first procurement reforms sa ika-25th Anniversary ng PhilGEPS

Muling iginiit ni Department of Budget and Management (DBM) Officer-in-Charge (OIC) Secretary Rolando “Rolly” U. Toledo ang matibay na commitment ng pamahalaan na pabilisin ang procurement modernization at palakasin ang tiwala ng publiko.

Ito ang kanyang mensahe bilang keynote speaker sa pagdiriwang ng 25th Anniversary ng Philippine Government Electronic Procurement System (PhilGEPS) sa PICC noong Huwebes, 21 Nobyembre 2025.

“Procurement is not paperwork—it is public trust in motion. Every transparent transaction is a Filipino family protected,” ani OIC-Secretary Toledo, na nagsabing ang silver milestone ng PhilGEPS ay selebrasyon ng progreso at paalala na dapat tuloy-tuloy at mas pabilisin pa ang reporma, nang may kababaang-loob at paninindigan.

Binigyang-diin din ni OIC-Secretary Toledo na nananatiling buo ang commitment ng administrasyon na ipagpatuloy at palalimin ang mga repormang sinimulan ni dating Budget Secretary Amenah F. Pangandaman, na naging pangunahing tagapagtaguyod ng open government, digital transformation, at procurement modernization.

Sa mga nagdaang taon, malalalim at malawakang reporma sa procurement ang naisakatuparan sa bansa. Pinaka-sentro nito ang proposed New Government Procurement Act (NGPA), na naglalayong i-modernize ang procurement rules at iayon ito sa global standards. Nagtatakda ito ng digital-by-default na proseso, tamper-proof documents, mas patas na kompetisyon, at mas matibay na anti-corruption safeguards—na magbubunga ng mas mabilis, mas malinaw, at mas ligtas na procurement system.

Kasabay ng NGPA ang full modernization ng PhilGEPS, kasama na ang upgraded Open Data Portal kung saan bukas at accessible sa publiko ang procurement information mula planning hanggang implementation. Dahil dito, mas nagkakaroon ng kapangyarihan ang mga mamamayan, media, researchers, at watchdogs na bantayan ang paggastos ng gobyerno sa real time.

Sa isang video message, binigyang-pugay ni dating DBM Secretary Pangandaman ang mahalagang papel ng PhilGEPS sa serbisyo publiko.

“Without PhilGEPS, the fulfillment of PS-DBM’s mandate as the central procurement arm for common-use supplies and equipment would not be possible… It is because of PhilGEPS… that we enjoy tools like the Virtual Store, eMarketplace, eBidding Facility, ePayment, merchant registry, and the open data portal,” aniya.

Idinagdag ni OIC-Secretary Toledo na lalo pang pinatibay ang mga repormang ito sa pamamagitan ng mas mahusay na interoperability tools, pinalawak na e-bidding capabilities, mas matatag na protest at review mechanisms, at pinalakas na capacity-building para sa iba’t ibang ahensya—lahat ito para makabuo ng procurement system na mabilis, matalino, at mas protektado laban sa abuso at anomalya.

Pinuri rin ni Toledo ang pagkilala sa Pilipinas sa Open Government Partnership (OGP) 2025 Global Summit sa Spain, kung saan nanalo ang bansa sa Anti-Corruption Category at Asia-Pacific Regional Award. Patunay umano ito na kinikilala sa buong mundo ang kredibilidad ng reporma ng Pilipinas.

“If the next 25 years of governance are to be defined by transparency, trust, and integrity, it will be because you chose to stay, you chose to serve, and you chose to stand as one,” pahayag niya sa mga kawani ng PS-DBM at PhilGEPS.

Nagpasalamat naman si PS-DBM Executive Director Genmaries Entredicho-Caong kay dating Secretary Pangandaman sa kanyang matatag na suporta, at pinuri ang continuity at leadership ni OIC-Secretary Toledo.

“We are certain that under the leadership of our DBM OIC-Secretary Rolly, the transformative reforms we initiated will not only continue but strengthen… Public procurement is in good hands,” aniya. “Secretary Rolly, you have our full support. We don’t simply wish you success—we will work with you to achieve it.”