MESSAGE OF THE HONORABLE DEXTER M. CALIZO, PROVINCIAL VICE GOVERNOR DURING THE INAUGURAL SESSION OF THE 20TH SP ON JULY 7, 2025 AT THE SP SESSION HALL

Sa isig ko ka Akeanon:

Nag-umpisa ako sa pagpanerbisyo publiko bilang Alcalde it banwang Balete ku dos mil deci sais (2016) o siyam nga dag-on eon ro nagtaliwan. Bago karon naga empleyo ako sa isaeang ka pribado nga companya ag ngani nga mahambae ko nga sibú gid rong akong experyensya pag abot sa pagpamanwa.

Sa it makaron, nagaatubang ako kinyo tampad ag owa it bahid nga pagpakuno-kuno. Ro akong experyensya it siyam nga dag-on hay rona naangot sa pagpatuman it mga programa, proyekto ag mga aktibidades nga ginplanuhan, gin-estudyuhan, ag ginbaeay it local development council, ku iba pang mga agencia ag opisyales, ku mga naga representar it sari-sari nga sector sa kumonidad nga may kapas magbaeay it mga pamaagi para makadaea it tayuyon ag matarong nga pag-um-ead para sa tanan.

Sa it makaron, nagatuon ako nahanungod kara eamang nga mapun-an rong akong kakueangan sa experyensya. Riya ako makaron sa proseso ginaeatob rong bug-os nga buot eamang nga ro experyensya mismo rong magturo kakon ku angay ag bagay nga pagdumaea it Consejo Provincial sa handum nga mataw-an it katumanan rong mga gina prioridad ku atong Gobernador.

Sa akon nga haagyan, masami ako nagapaeapit sa Sangguniang Bayan para pangayuon kanda rong legislative support sa mga PPAs nga ginhandum nga ipatuman it executive offices. Eubot ko ag batyag ko gid rong ginapaabot it atong Gobernador kaina sa anang mensahe, kumo anay rona man ako sa anang nahamtangan bilang Local Chief Executive. Ngani ron nga kami riya sa Sangguniang Panlalawigan hay magahimakas man nga katuwangan rong atong Gobernador nga mataw-an it katumanan rong ginahandum nga mga programa, proyekto ag mga aktibidades sa sueod ngara it tatlong dag-on it among pagpanerbisyo.

Ginahinyo ko eang sa tanan nga executive offices riya sa Capitol nga sa mas temprano, inyo kamon nga ikapaabot rong mga PPAs nga nagakinahang-ean it legislative actions eamang nga mataw-an it nagakaigo nga sabat rong mga posibleng sab-eag nga magaabang sa pagpatuman karon. Mas mayad gid nga hipungkuan naton ag maestoryahan rong inyong mga habaeay eon nga roadmaps sa baylo nga maplastar naton it mayad ag mangin tayuyon rong aton nga pagpamanwa.

Ginahinyo ko man sa akon nga mga kaibahan riya sa Consejo Provincial rong inyong pag-unong sa kadaeag-an it Akean ag ku tanan eabi eon gid ratong mga ginkueabos. Ibutang ta anay rong pamulitika sa binit ag kabuligan tang makabaeay it mga pagsueondan nga makadaea katon tanan sa mas mayad pang Akean kay sa ku kahapon. Makidagyaw kita sa ginahimakas kung Executive Departments nga mga PPAs nga nahathat eon sa atong nari-saring Provincial roadmaps for development.

Sa mga cooperatiba, People’s organizations, sa Civil Society Organizations ag pribadong sektor, bukas ro Sangguniang Panlalawigan sa pagbaton it inyong mga ideya ag suhesyon eamang nga madebatehan ta it mayad rong mas angay ag bagay nga mga pagsueondan riya sa aton. Sa it makaron, mas mayad gid nga magpa accredit kamo o magparecognized para mas maeumo katon tanan makahimo it pormal nga paghueogpong.

Sa isig ko ka Akeanon, onongan naton tanan nga pandayon ta rong atong hin-aga sa it makaron. Ro inyong aktibo nga partisipasyon sa atong pagpananwa hay mabahoe rong ikabulig kamon nga inyong pinili sa pagdumaea. Ro inyong mueo, rong inyong kablit hay padumdom kamon ku among responsibilidad ag sinumpaan nga obligasyon nga serbisyuhan kamo sa tampad ag matarong nga pamaagi. Kaibahan kinyo, posible nga mabaeay naton rong Akean nga mas mayad pa kaysa ku kahapon.

Vaya con Dios Akean.

Padayon kita.

Mayad ayad gid nga hapon kinyo tanan