Team Uswag campaign kickoff, gintambungan sang 40K ka Ilonggo, karibal nga partido makatipon lamang sang 2K ka tawo

Iloilo City- Masobra sa 40,000 ka tawo ang nagtipon sa campaign kickoff sang Team Uswag sa Iloilo Freedom Grandstand sang Biyernes, March 28, suno kay Iloilo City Mayor Jerry Treñas.

Sa iya speech, ginhambal ni Trenas nga sa iya 39 ka tuig sa serbisyo publiko, wala pa gid sia sing nakita nga rally nga subong kadaku sang kickoff sang Biernes samtang ginapasalamatan niya ang kadam-an sa ila mabaskog nga suporta.

“Currently, we have 40,000 attendees. The districts of Jaro, Mandurriao and Arevalo are complaining because they’re not here,” siling ni Trenas, nga nagdugang nga ang rally sang iya karibal nga partido may yara lamang sang kubos sa 2,000 ka mga nagtambong. Sa tion sang rally, nagdeklarar si Treñas nga makahimo siya sang political comeback kun magdesisyon man ang isa ka “drug protector and financer” nga magbalik sa pulitika.

“Mapulupahuway ako kay kon magbalik ang ‘protector’ kag ang ‘financier’ mabalik man ako (I will take a break for now, but if the protector and financier returns, I will return too),” siling ni Trenas Samtang wala siya nagsambit sang pangalan, maathag nga ginatumod ni Trenas si anay Mayor Jed Patrick Mabilog nga nagbiya sa pungsod sadtong 2017 matapos nga gin-angut siya ni anay Presidente Rodrigo Duterte sa illegal drug trade kag sa napatay nga drug lord nga si Melvin “Dragon” Odicta.

Gintawag man ni Duterte ang syudad sang Iloilo bilang “most shabulized” nga syudad sa pungsod sa pagpamuno ni Mabilog. Sang nagpungko ini sa pwesto sang 2019, gin-ako ni Trenas nga ang “most shabulized” nga tag sa siyudad ang naghatag sang serious challenge sa iya administrasyon.

“Pagpungko ko sang 2019, binudlayan ako. Ngaa? kay gintawag ang siyudad ta nga ‘most shabulized city’ in the Philippines (I struggled when I took office in 2019. Why? Because our city was labeled as the most shabulized city in the Philippines),” siling niya. Apang, sang pagpanguna ni Treñas, nakahimo ang Syudad sang Iloilo sa pag-isol sang negatibo nga imahe kag nakalab-ot sa iya karon nga kahimtangan bilang isa sa pinakamaayo nga mga syudad sang pungsod.

Suno sa Alkalde, madula ang ganansya sang Iloilo City kun tugutan sang mga Ilonggo nga makabawi sa poder ang ini nga protector kag financer. “I am sure that our people do not want their children to be affected by drugs. They want to come back to bring back the drugs. Not anymore. Never again. Never again,” siling ni Treñas. Samtang nagapanago sa luwas sang pungsod, ginmanduan si Mabilog nga dismissed sa pwesto sang Office of the Ombudsman sadtong 2017 bangud sang serious dishonesty kasunod sang kapaslawan sini sa pagpaathag sang iya alleged questionable wealth nga nagabalor sang P8.9 million humalin 2012 tubtub 2013.

Bisan pa nga nakabaton sia sang executive clemency gikan sa Malacañang sa mga administrative penalties sang nasambit nga kaso, nagapangatubang gihapon si Mabilog sang mga panumbungon nga graft charges sang Sandiganbayan bangud sa paghatag sang kontrata sang gobyerno sa isa ka towing services firm sa diin may interes sia.

Sang nagbalik ini sa pungsod pagkatapos sang termino ni Duterte, nagpiyansa si Mabilog sang P90,000 para sa iya temporaryo nga kahilwayan.