‘Liwanag sa Dilim’ music video handog ng film workers, supporters kay Robredo

Isang music video na nagtatampok kay Vice President Leni Robredo at sa pag-asa na dala niya para sa bansa at sa mga Pilipino ang inilunsad ng iba’t ibang film workers, mang-aawit at maraming volunteer groups na sumusuporta sa kanyang kandidatura bilang pangulo.

Nagtuwang sina Yeng Constantino at Rivermaya para kantahin ang“Liwanag Sa Dilim”, kung saan kasama rin ang iba’t ibang personalidad gaya ng mga artistang sina Angel Locsin at Piolo Pascual. Kasali rin sa video ang anak ni Robredo na si Aika pati na si Elmer Cordero, isa sa anim na driver ng pampasaherong jeep na nakulong matapos iprotesta ang pagpapatigil ng kanilang biyahe noong lockdown.

Kasama rin si Sherwin Descalso Abdon, ang rider ng motorsiklo na nag-angkas kay Robredo patungo sa venue ng Cavite grand rally sa Tanza, at iba pang volunteer groups sa video na idinirek ng award-winning na director na si Irene Villamor.

Bilang paliwanag sa pagkakapareho ng video sa sikat na bandang Thirty Seconds to Mars, inamin ni Villamor na isa ang grupo sa nagsilbing inspirasyon nila sa music video.

“Yes, for those who said Thirty Seconds to Mars vibe siya, yes isa nga yun sa mga naging inspiration for this music video,” paliwanag ni Villamor. Maliban sa Film Workers for Leni, kasama rin sa paggawa ng video ang Bikers for Leni, LGBTQIA+ for Leni, K-Pop Stans 4 Leni, PWD for Leni, Youth for Leni, Seniors for Leni, TODA for Leni, Food Service Crew for Leni at Chefs for Leni.

Tampok din sa video ang Muslim Community for Leni, Tourism Workers for Leni, Teachers for Leni, Momshies for Leni, Skaters for Leni, Doctors for Leni, Dancers & Theater Artists for Leni,’ Construction Workers for Leni. Cheerleaders for Leni, Jeepney Drivers for Leni, Indigenous Peoples for Leni, at Chinese-Filipino Community for Leni.

“Salamat sa mga volunteers ng Film Workers For Leni at sa mga iba’t ibang sector na tumulong para maging possible itong music video na ito. They’ve shared their hopes and dreams for a better Philippines,” wika ni Villamor.

Nag-trending din ang hashtag #LeniLiwanagSaDilim matapos i-post ng volunteers teasers ng music video. Nakakuha rin ng libu-libong views ang teaser mula nang ito’y ilabas. “Wow! Thousands of views na! So happy at maraming na excite sa pa teaser namin kagabi!” ani Villamor. “Nakatutuwa dahil ang hangarin naman talaga natin ay isama ang lahat sa biyahe tungo sa mas magandang bukas,” dagdag pa niya.