Nagbenta ng Ari-arian Para Lamang Makasali sa Team Pilipimas

Ni: Shaine Sorossa

Nakaaantig ng damdamin ang kwento ng 17-anyos na si Divine Adili matapos ibunyag ng kanyang kaibigan at kinatawan ng pamilya na kinailangan umanong magsakripisyo nang malaki ang kanyang mga magulang upang matupad ang kanyang pangarap na makapaglaro ng basketball sa Pilipinas.

Sa isang panayam, ibinahagi ni Prince Eze Nnamdi na karaniwan sa mga foreign student-athlete mula sa Nigeria ang pagbebenta ng mga ari-arian, pagsasangla ng lupa, o pangungutang upang makapag-ipon ng sapat na halaga para sa pamasahe at iba pang gastusin papunta sa Pilipinas.

Ayon kay Nnamdi, may mga magulang na napipilitang ibenta ang kanilang lupa o sasakyan upang mabigyan ng pagkakataon ang kanilang mga anak na maipakita ang kanilang talento at magkaroon ng mas magandang kinabukasan.

Sa murang edad, ipinadala si Divine sa Pilipinas upang ituloy ang kanyang pangarap bilang isang student-athlete. Tulad ng maraming kabataang nangangarap, hindi naging madali ang kanyang paglalakbay. Sa kabila ng pagiging malayo sa pamilya, sinikap niyang makatulong sa kanilang kabuhayan sa pamamagitan ng pagpapadala ng bahagi ng kanyang allowance sa kanyang mga magulang at mga kapatid.

Dahil dito, maraming netizen ang nakapansin ng pagkakatulad ng kanyang kwento sa buhay ng yumaong basketball player na si Rene Baterbonia, na kinilala rin bilang isang mapagmahal na anak at kapatid na nagsikap para sa kanyang pamilya.

Sa paglabas ng mga bagong detalye tungkol sa buhay ni Divine, muling nabigyang-diin ang mga sakripisyong ginagawa ng maraming kabataang atleta at kanilang mga pamilya upang maabot ang kanilang mga pangarap.

Dahil dito, nananawagan ang ilang tagasuporta at kaibigan ng atleta ng pagkakaisa at bayanihan upang maipakita ang suporta kay Divine at sa kanyang pamilya sa gitna ng kanilang pinagdaraanan.