Batang 4Ps ng Aklan Gold Medalist sa WVRAA 2026

Testimonya ni C-Jay T. Tapang
Benepisyaryo at minomonitor ng 4Ps

MAKATO, Aklan-Sa murang edad, natagpuan ni C-Jay T. Tapang ang kanyang sarili sa isang larangan na nangangailangan ng lakas, disiplina, at tapang-ang wrestling. Nagsimula ang lahat noong siya ay nasa Grade 7, kung saan unang nahubog ang kanyang talento.

Ang pamilya ni C-Jay ay nakatira sa Brgy. Poblacion ng bayan na ito at isang aktibobg miyembro ng 4Ps. Ang kanyang ama na si Christopher ay isang laborer at bilang magulang walang sawang sumusuporta sa pangarap ng anak. Nasa sa dugo nga nila ang pagiging atleta dahil Inspirasyon niya ang kanyang nakakatandang kapatid na minsan ding naging kalahok sa Western Visayas Regional Athletic Association (WVRAA).

Hindi naging madali ang paglalakbay ni C-Jay bilang isang estudyanteng atleta. Ngunit sa kabila nito sandigan ng pamilya ni C-Jay ang 4Ps. Bilang benepisyaryo ng 4Ps, malaki ang naitulong nito sa kanyang paglalakbay bilang estudyante at atleta.

Ang tulong pinansyal na kanilang natatanggap ay naging daan upang masuportahan ang kanyang pang-araw-araw na pangangailangan sa paaralan
mula sa baon, gamit sa eskwelahan, hanggang sa mga gastusin sa kanyang pagsasanay sa isport na wrestling.

Sa pamamagitan ng 4Ps, nabigyan si C-Jay ng pagkakataong magpatuloy sa pag-aaral nang hindi gaanong iniintindi ang kakulangan sa pinansyal. Naging inspirasyon din ito sa kanya upang mas pagbutihin ang kanyang pag-aaral, dahil kaakibat ng programa ang responsibilidad na manatiling aktibo sa paaralan.

Hindi lamang tulong-pinansyal ang 4Ps ito ay naging pundasyon ng kanyang disiplina at determinasyon. Habang hinuhubog niya ang kanyang lakas sa wrestling mat, hinuhubog din siya ng programa bilang isang responsableng mag-aaral at anak. Ang suporta ng 4Ps, kasama ang gabay ng kanyang pamilya, ay nagsilbing lakas niya sa bawat laban, sa loob man o labas ng arena.

Noong 2023, unang sumiklab ang pangalan ni C-Jay sa pambansang entablado. Sa Palarong Pambansa ginanap sa Marikina, nasungkit niya ang Gold Medal sa men’s Wrestling division—isang napakalaking tagumpay para sa isang batang atleta mula sa probinsya.

Noong 2024, sa parehong kategorya, nagtamo siya ng Silver Medal sa WVRAA ginanap sa Bacolod City. Hindi man ito ang inaasam na ginto, nagsilbi itong aral at motibasyon upang pagbutihin pa ang kanyang kakayahan.

Pagsapit ng 2025, muli siyang humarap sa hamon at nagtapos bilang Bronze Medalist sa WVRAA. Para sa iba, maaaring ito ay pagbagsak, ngunit para kay C-Jay, ito ay isang hakbang paakyat.

At dumating ang taong 2026, ang taon ng kanyang pagbabalik. Sa ginanap na WVRAA 2026 sa Passi City, Iloilo nitong March, muling ipinakita ni C-Jay ang kanyang determinasyon at puso ng isang mandirigma. Sa bawat laban, dala niya ang kanyang mga natutunan mula sa nakaraan. Nasungkit niya ang Gintong Medalya sa Wrestling 58 kg Junior Secondary Boys Category.

Dahil sa kanyang tagumpay, siya ay opisyal na kalahok sa Palarong Pambansa 2026 na gaganapin sa Agusan del Sur, Mindanao sa Mayo 24, 2026, isang panibagong yugto ng kanyang laban at pangarap.

Bilang isang Grade 11 student, hindi lamang medalya ang kanyang hinahabol. Pangarap niyang maging isang seaman balang araw at maabot ang mas mataas na antas ng kanyang talento. Hangad din niyang magkaroon ng iskolarship sa unibersidad bilang isang estudyanteng atleta upang mas lalo pang mahasa ang kanyang kakayahan sa wrestling.

Ang kwento ni C-Jay ay kwento ng tiyaga, sakripisyo, at walang sawang paniniwala sa sarili pinagtibay ng mga oportunidad na ibinigay ng 4Ps.

Mula sa simpleng batang may pangarap, siya ngayon ay isang inspirasyon—patunay na sa tamang suporta, sipag, at determinasyon, ang tagumpay ay kayang abutin. At sa kanyang paglalakbay, isang bagay ang malinaw kay si C-Jay na hindi lamang lumalaban para sa medalya, lumalaban siya para sa kanyang pangarap, para sa kanyang pamilya, at para sa mas maliwanag na kinabukasan. (Submitted by: Angelica Fuerte-Tabanera, ML Makato, Aklan POO)
#BawatBuhayMahalagaSaDSWD