​DOJ: DAR Clearance at Limitasyon sa Lupa ng CARP, Hindi na kailangan

​Ayon sa opisyal na legal opinion ng Department of Justice (DOJ), hindi na kailangan ang clearance mula sa Department of Agrarian Reform (DAR) para sa pagpaparehistro ng paglilipat ng mga pribadong lupang pang-agrikultura. Kasabay nito, idineklara rin ng DOJ na wala nang bisa ang retention limits o ang takdang sukat ng lupa na maaaring ariin sa ilalim ng Comprehensive Agrarian Reform Law (CARL).
​Sa Opinion No. 16, s. 2026 na may petsang March 9, 2026, nilinaw ni Justice Secretary Fredderick A. Vida na nagtapos na ang bisa ng Comprehensive Agrarian Reform Program (CARP) noong June 30, 2014. Ito ay dahil sa nakapaloob na “sunset clause” o takdang petsa ng pagtatapos ng programa sa ilalim ng batas (Republic Act No. 6657, na inamyendahan ng R.A. No. 9700).
​Dahil dito, ang mga probisyon ng batas, kabilang ang limang (5) ektaryang retention limit para sa mga may-ari ng lupa, ay wala na ring legal na basehan.
​Bunga nito, sinabi ng DOJ na hindi na kailangang humingi ng Land Transfer Clearance mula sa DAR bago mailipat ang titulo ng mga pribadong lupang agrikultural.
​Ang opinyon ay tugon sa liham ni Land Registration Authority (LRA) Administrator Gerardo Panga Sirios na nagtatanong kung kailangan pa rin ba ang DAR clearance para sa pagpaparehistro ng mga bilihan o paglilipat ng lupang agrikultural, sa kabila ng pagtatapos ng panahon para sa pagkuha at pamamahagi ng lupa sa ilalim ng CARP.