NIA-Western Visayas Nagpaabot ng Tulong Sa Mga Magsasaka sa Malinao, Aklan Sa Pamanagitan Ng Solar Irrigation.

Malinao, Aklan -​Pinalakas ng National Irrigation Administration Region VI (NIA VI) ang suporta nito sa bayan ng Malinao, Aklan matapos personal na inspeksyunin ni Regional Manager Engr. Jonel B. Borres ang Solar-Powered Irrigation Pump Project (SPIPP) na matatagpuan sa Barangay Kinalangay Nuevo.
​Bagama’t kasalukuyang gumagana ang pasilidad sa Kinalangay Nuevo, nakita sa pagsusuri ang pangangailangan para sa regular na maintenance at dagdag na kapasidad upang mas mapakinabangan ng mga lokal na magsasaka ang patubig.
​Dahil dito, agad na inatasan ni RM Borres ang Aklan-Capiz Irrigation Management Office (ACIMO), sa ilalim ng pamumuno ni Acting Division Manager Engr. Julieta E. Gallardo, na maglagay ng karagdagang mga solar panel at kumpunihin ang mga sirang bahagi ng sistema.
​Ang maagap na hakbang na ito sa Malinao ay inaasahang magbibigay ng sapat at maaasahang supply ng tubig sa 5 hanggang 7 ektaryang sakahan sa lugar, na direktang magpapaganda sa ani at kabuhayan ng 19 na magsasakang benipisyaryo sa bayan.
​Ang proyektong ito ay bahagi ng patuloy na pakikipagtulungan ng NIA VI sa pamahalaang lokal ng Malinao at sa mga lokal na Irrigators Association upang modernisahin ang sistema ng patubig sa lalawigan ng Aklan.