Usapang Organik

By: Raymond Sucgang

Kapag ang iyong organic farm ay na-enundate o nalunod ng baha, at ang tubig-baha ay dumaan din o nanggaling sa isang farm o hardin na gumagamit ng inorganic fertilizer o synthetic chemicals, hindi mo na maaring i-Claim na organic pa rin ang iyong ani o produkto.

Bakit? Dahil ang prinsipyo ng organic farming ay ang pag-iwas sa anumang uri ng kemikal na artipisyal—tulad ng synthetic fertilizers, pesticides, at herbicides. Kapag ang tubig-baha ay tumawid mula sa isang inorganic farm papunta sa iyong organic farm, malaki ang posibilidad na may dalang residue ng mga kemikal na iyon ang tubig.

Ang kontaminasyon ay maaaring mangyari sa lupa, sa dahon at bunga ng mga tanim, at lalo na sa ugat kung saan pumapasok ang nutrients (at kasama na ang contaminants). Kahit pa hindi sinasadya o pansamantala lamang ang pag-enundate, ang pagkakaroon ng kontaminasyon mula sa ibang sources ay sapat upang hindi na ito matugma sa mga organic certification standards.

Sa ganitong sitwasyon, ang iyong produkto ay hindi na maituturing na certified organic dahil hindi na ito “chemically isolated” o hiwalay sa non-organic na sistema. Hindi ito usapin ng intensyon kundi ng aktwal na kondisyon ng produksyon.

Kaya’t napakahalaga ng tamang lugar at maayos na water management sa mga organic farms. Mainam na may physical barriers, water diversion canals, o buffer zones upang maiwasan ang paghalo ng tubig na galing sa mga farm na gumagamit ng inorganic inputs.

Ang integridad ng organic farming ay nakasalalay sa buong proseso—mula sa lupa, tubig, tanim, hanggang sa pag-aani. Sa panahon ngayon ng pabago-bagong klima at pagbaha, mas lalong kailangang bantayan ang mga ganitong aspeto upang mapanatili ang tunay na kahulugan ng pagiging organic.